Tigsik

Tigsik ko ining ginigibong medical mission

Sa Syudad nin Naga ngunyan na panahon

Makaogma ta bako man panahon eleksyon

Pag-umawon an liderato ni Meyor Legacion

Tigsik ko kun igwa nin pagmedical mission

An minaruso na mga pasyente kadakulon

Ta minaaprobitsar kan mga libreng bolong

Na dai na kaya kan mga tikapo na barakalon

Tigsik ko an sarong hilang kan sosyodad ta

Ini iyo an anuman na sugal na legalized na

Imbes makatabang orog na nagpapatios pa

Pambakal na sanang bagas itataya pa baga

Tigsik ko ining masustansyahon na talong

Pweding tortahon, igisa, o sa sinigang iayon

Prituson, labunan sana pwede pang asalon

Basta may tauyo, lemon talagang managom

Tigsik ko man an mga senyor na o guragod

Na pirmi na sana man baga celfon an kapot

Matanga na sige pa youtube dai nagtuturog

Kaya pagkiblit nin agom naaanggot pa logod