Tigsik

Tigsik ko ining sarong taga-Nagang milyonaryo

Na dawa dai man nakakapwesto sa gobyerno

Sa mga nangangaipo bakong timawa sa sentabo

Asin mapinadangat sa mga nagseserbi nin tutuo

Tigsik ko an iba sa mga milyonaryong pulitiko

Sa hararayong lugar dai reparo an pangangaipo

Orog an raraot na mga dalan, tulay asin tinampo

Sa transportasyon, komunikasyon, tios na tutuo

Tigsik ko ining ginigibong mga medical mission

Sa pagtarabangan kan LGU Naga asin Ako Bikol

Dakulang tabang ta libreng konsulta asin bolong

Mga laboratoryo, na kun tikapo, dai kakayahon

Tigsik ko, kamugtakan ngunyan kan nasyon ta

Na namimiligro sa pag-atake kan mga terorista

Sa ibang lugar igwa nang nangyaring pagbomba

Kaya dapat maging marigmat, mga kahimanwa

Tigsik ko ining peligroso ngunyan na helang

Orog na sa mga gurang na asin mga kaakian

Kaya kun may kalintura, nag-aabo nin alang

Magpadoktor na para mabolong tulos man