Tigsik

Tigsik ko kun minaabot an Christmas season

An mga ginigibong pagpaparty, ibong-ibong

Kaya kadakol na an inaataki nin alta presyon

Ta nanganaan na nin pagkakan orog an litson

Tigsik ko an ibang nakaresibi na nin bonus

Ipinamayad utang, may nagshopping tulos

Uminagi sana sa kamot ta tulos na naubos

Ta sa panahon na ini kaya, dakol nin gastos

Tigsik ko man kun minaabot na ining Pasko

Siribot na an mga tawo pamakal nin regalo

Kaya parano-pano sa mga mall, sa sentro

Matrapik, ta surusuan na sa mga tinampo

Tigsik ko, mga ilegal na vendor oroaldaw

Haralaba na an liog ta pirmi sanang tanaw

Mga myembro kan PSO na iyong paraalaw

Kun natutulag, tiribwasan na garo langaw

Tigsik ko ngunyan an mga saradit na aki

Na an mga ugali daog pa talaga an hadi

Kagustuhan sa celfon masakit mababari

Orog kun pinapaagi sa balinghaw, sa hibi