Tigsik

Tigsik ko kun ining bagong Taon minaabot

Kadaklan sa mga tawo, biyong nasisibot

Pagbakal nin mga prutas, gulay na birilog

Ta swerte daa segun sa indang pagtubod

Tigsik ko ining pagtubod nin mga tawo

Dawa pa gabos na birilog bakalon nindo

Kun magparatururog sana nganga kamo

Sa paghigos, paghinguha an pag-asenso

Tigsik ko an mga tawong gusto magbakli

Bako Bagong Taon makababago kan gawi

Orog an igwa nin mararaot na pag-uugali

Anuman oras paggibong marhay bumawi

Tigsik ko, kun katuninungan ta an mawot

Dapat kun an Bagong Taon na minaabot

Dai pagsabaton nin rebok o mga paputok

Tibaad sabaton kita nin purutol na kamot

Tigsik ko an mga tawong marhay an buot

Magtorotot na sana imbes na magpaputok

Alagad sa mag-aragom likayan magtorotot

Ta siguradong an iribahan nindo mararaot