Tigsik

Tigsik ko kun panahon na nin semana santa

Kadakol kan mga minauruli na bakasyonista

Sa halawig na bakasyon, pahingalo nauogma

Parano an mga resort, pasyaran, iyo an resulta

Tigsik ko ining Bulan nin mga Kababayihan ta

Ini bilang baga pagtao sa mga babayi nin honra

Na an mga babayi, bakong basta -basta sana

An mga papel ninda sa sosyodad ta mahalaga

Tigsik ko an iba sa mga teritoryo kan nasyon ta

Kaya palan pigpapangalad na kan nasyong Tsina

Ta si dating presidente may pinirmahang kontrata

Na an mga barko kan PCG, paparalayason na daa

Tigsik ko ining mga aki na dai tuod kan pagtios

Kaya sa diit na kadipisilan nadidepres na tulos

Bakong arog kan mga aki na sa pagtios natuod

Dawa anong sakit inaagihan orog na minapusog

Tigsik ko man kitang mga magurang ngunyan

Bantayan nanggad an sa tuyang mga kaakian

Ta sa sosyal media kadakol an mga kabuahan

Tibaad an mga aki ta logod maimpluwesiyahan