Tigsik

Tigsik ko ining suwi nang panahon talaga

Dapat kuta sa mga bulan na ini tig-uran na

Hay, ta nangisnit na baga sa kapalibutan ta

Dawa maghuruba, an ganot tabog-tabog pa

Tigsik ko baga ining abang init na panahon

An iba, kaya man kuta maggamit nin aircon

Alagad kun an bill sa kuryente halangkawon

Haros pa sana atakehon na nin alta presyon

Tigsik ko an mga buaya, sa satong gobyerno

Mga kabuahan, kaputikan dakop nang tutuo

Alagad nakakalibre pa, dai pa nakakalaboso

Ta may mga hudas nakakadulag an mga iniho

Tigsik ko an mga nakapwesto sa gobyerno ta

Na dai nagmamangno sa kamugtakan kan iba

Nasa mga harayong lugar, an pagtios grabe na

Mga charity vloggers, iyong nakakataong ayuda

Tigsik ko pa an abang luluyang mga pulitiko

Sa pagtabang, daog kan charity vloggers kamo

May scholarship, may pabahay an mga iniho

Nadudumanan, mga dai kayang abuton nindo