Tigsik

Tigsik ko ngunyan, kadaklan sa mga Pinoy

Na nagrorokyaw, biyong nagtuturutaghoy

Ta sarong manyakis, na nagtago nin haloy

Kan maaresto biyo nang rolontoy si manoy

Tigsik ko man, mga tsinoy na sagin Pilipino

Na garo dai labot sa mga isinangat na kaso

Kan maaresto na, garo pang nakakainsulto

Nasa senado na, dai pa nagsasabi nin tutuo

Tigsik ko kun nagkakaigwa nin Traslacion

Dai nahahali, mga boyadores na nakainom

Ta dai matagalan an parong na mabataon

Maburat sa arak dai sa malaen na parong

Tigsik ko pa man an kadaklan sa mga tawo

Na dai pa nagigimata sa pagtubod na tutuo

Sa tunay na pagsamba nalalagalag na gayo

Pag-aliluya sa mga diyus-diyusan, mas gusto

Tigsik ko man, ibang Nagueno na pasalihon

Imahe ni Peñafrancia yaon sa bilog na taon

Ta dai dalawon, hapruson dawa maghapon

Nakikisusuan pa kun panahon nin Traslacion