Tigsik

Tigsik ko ngunyan na panahon an mga Pinoy

Isyu sa manyakis na pastor biyo nang nauumoy

Mga supurtadores kaini gusto duyanon si nonoy

Natatakot ta kun malangob si among nin haloy

Tigsik ko ining sarong kortrobersyal na pastor

Mga nabiktima daa kaini mga hoben o menor

Dai pa nasusupog na magparahagad nin pabor

Kaya biyo nang naggugulugulo an mga senador

Tigsik ko man ining mga isyu sa iligal na POGO

Kadakol na imbwelto an mga nagin bilyonaryo

Orog na an mga nagsagin-sagin na mga Pilipino

Golpe an nalansi sa mga opisyal nin gobyerno

Tigsik ko kun traslacion asin fluvial procession

An iba sa mga boyadores an gawi makauyamon

Mantang naghahalat pa ki ina, nag-iirinom-inom

Kaya kun ralasngag na dawa ano pwede gibuhon

Tigsik ko kun may dakulang selebrasyon sa Naga

An nawawalat sa palibot ta pahingurag na basura

Pirang trak na mga panghakot kinukulang pa talaga

Kaya an LGU Naga naghihingowang madagdagan pa