Tigsik

Tigsik ko ngunyan an Syudad nin Naga

Pagkatapos kan bongahon na piyesta

Tuninong na daing nagkuriyat na basura

Ta an mga parahakot naghirigos talaga

Tigsik ko an mga igwa nin motorsiklo

Tanganing malikayan an mga diskwido

Dai pagpalayugon na garong eroplano

Makahirak man kan nababayaan nindo

Tigsik ko man an maiisug na mga Pinoy

Dai minapadaog sa makukuris na Tsinoy

Na gusto kitang piripiton na garong tikoy

May sala na gusto pa iduyan, iuguy- uguy

Tigsik ko an mga tawo, na dai nagtitios

Na kaya nang bakalon kan kwarta gabos

Mga kaipo sa buhay sa inda nang gahos

Pero matinabang dai nalilingaw sa Diyos

Tigsik ko an mga tunay na nagsasalingoy

Sa mga tawong nakaagap ki Nene, Nonoy

Arog baga kaiyan, kadaklan sa mga Pinoy

Pagtanaw nin utang na buot dai nauumoy