Tigsik

Tigsik ko an mga lugar na inagihan nin bagyo,

Talagang grabe an iwinalat na mga destroso.

Mga pagrorogaring asin buhay nin mga tawo,

Sa madalian na pagbangon ninda kaya paano.

Tigsik ko an mga mensaheng ipigpapahayag,

Sa mga nangrayari sa kinaban na kalamidad.

Bako daw na an pagbabakli ta iyo na an dapat?

Sa paggibo nin maraot magbarago na nanggad?

Tigsik ko an mga opisyal kan satong gobyerno,

Na dai nang -ikit sa mga itinao sa tuya na pondo.

Hale sa “calamity fund’ pagkatapos kan bagyo,

Ta talagang iwinaras man sa mga nangangaipo.

Tigsik ko man mga nasa barangay na tagalista,

Na dai namimili nin mga tatawanan nin ayuda.

Alagad kun an mga paryentes an natawan sana,

Asin dakol an nakanganga, haen an konsensiya?

Tigsik ko man an iba sa satong mga kahimanwa,

Kan kasagsagan nin kalamidad nagparahingowa.

Dawa sa diit na paagi nakaayuda sa mga biktima,

Sa paagi nin kakanon, inumon, gubing asin iba pa.