Tigsik

Tigsik ko ining plasa sa Naga na Nagayon,

Ngunyan lapa na kaipo an rehabilitasyon.

Sarong senador, nagtao nin milyon milyon,

Tanganing ining plasa maibwelta an gayon.

Tigsik ko ining nag-iinit nang buhay pulitika,

Mga kandidato imbes ihayag an plata porma.

Pagsukit sa kakundian kan iba siribot sinda,

Kun dai manraot nin kalaban, pyerde na daa.

Tigsik ko an sarong opisyal nin gobyerno ta,

Pighahapot, napasaen milyones na kwarta ?

Dakol na peking resebo an mga ipigpresenta,

Aram man kan gabos kun siisay an nagbulsa.

Tigsik ko ining gobyerno na pano nin kurapto,

Na sa “calamity fund” dakulon pa nin pondo.

Dai nin haditan dawa may umabot na bagyo,

Sa mga mahabon iyo ngani an gustong- gusto.

Tigsik ko an mga tawong pirming problemado,

Kun dai na kaya haros maghugot an mga iniho.

Dapat magrani asin mag-osip sana sa Diyos kamo,

An poder Niya mas dakula sa problema nindo.