Tigsik

Tigsik ko, ibang peryahan sa mga piyestahan,

Haloy nang tapos an piyesta yaraon pa dyan.

Sa aktibidad na iligal, ginigiribong taragbuan,

Orog an transaksyon sa droga, iligal na sugal.

Tigsik ko an helang na cancer sa sosyodad ta,

Ini an daing katapusan na problema sa droga.

An mga ”users, pushers” an nadadakop sana,

Paglangkaba kan mga ''drug lord” padagos pa.

Tigsik ko ining mga nagtitirios tang kahimanwa,

Haros dai na ngani magkarakan minahirilang pa.

Pambakal bolong problema kun saen na makua,

Dagdagan pa kun igwang pigpapaeskwela baga.

Tigsik ko man ining paabuton na noche Buena,

Dai gabos igwa nin kwarta, kakanon na abunda.

Kontento na daa sa pansit na an bangot tinapa,

Basta turuninong, sararo, maogma an pamilya.

Tigsik ko an ”Patsupon ni Mon” sa Calabanga,

Programa para sa mga ina na an gatas maluya.

An mga ama kaya dai na makiagawan kuta na,

Na an gatas para sa omboy dai makulangan pa.