Tigsik

Tigsik ko ining pagselebrar nin kapaskuhan,

Bako ini an ki Kristo, tunay na kamundagan.

Padanayon, pagkamuot asin katuninungan,

Ta katuninungan iyo an tunay na kahulugan.

Tigsik ko an paggastos na dai nin pakimano,

Kan mga pondo sa mga opisina nin gobyerno.

Pagsukit sa mahahabon garo mauuli sa zero,

Ta kinakamang na kan mga tawong poderoso.

Tigsik ko ining mga kandidatong siribot-sibot,

Hararayong lugar sa inda nang nagkakaarabot.

Tanganing makua, mga pwestong minamawot,

Mga ipigpromisa dai man malingawan logod.

Tigsik ko an mga dai naghihiwas na tinampo,

Alagad ta nagpaparadakol an mga behikulo.

Mga reblocking dagdag sa gurubot na trapiko,

Kaya mga byaheng pa Manila pirmi atrasado.

Tigsik ko ining pag-aginaldo o simbang banggi,

Na sa ngunyan inaapod daa na simbang kami.

Ta sa mga magpiday saro ini sa indang paagi,

Na magkahirilingan, magkairibahan na pirmi.