Tigsik

Tigsik ko an kadaklan kun panahon nin Pasko,

Nasa isip ninda kwarta, mga kakanon, regalo.

Irinuman, karakakanan baga nin pahinggusto,

Bako kun ano ta pigseselebrar kan mga tawo?

Tigsik ko kun nagkakaigwa, mga selebrasyon,

Nagbabaha talaga nin kakanon asin inumon.

Orog kan matataba, arog baga kaining litson,

Kaya kadakol kan inaaratake nin alta presyon.

Tigsik ko man kun ining Pasko pigseselebrar,

Kun bastatante man sa gabos kitang kadaklan.

An mga nagtitios asin tikapo kadakol pa man,

Naghaharong- harong, naghahagad pagkakan.

Tigsik ko man ining mga pulitikong mabubuot ,

Sa mga nagtitios nagtao man nin regalo gayod.

Hale sa sadiring bulsa ninda an mga ginastos,

Milyones na pondo kan gobyerno dai kinurakot .

Tigsik ko man an tunay na ispiritu kan Pasko,

Katuninungan sa oroaldaw na buhay nin tawo.

Rekonselyasyon sa Kaglalang kaining mundo,

Asin an tunay na relasyong ispiritwal ki Kristo.