Tigsik

Tigsik ko ining Cam. Sur na satong probinsiya,

May mga lugar na pirmi nang pigbabaha talaga,

Kaibahan nang pigtutubig an Syudad nin Naga

Kaya an “flood control” nakaplano na man daa.

Tigsik ko an mga lugar na talagang harababa,

Kaya kun tig-uran na, pirmi nang pigbabaraha.

An mga tawo igwa na nin mga baroto, bangka,

Tangani an mga bitis dai maalipong o malapa .

Tigsik ko an mga tawong dai naglilinig talaga,

Ta sa kabaglaan turuod na, sa buhay kaiba na.

Kaya sa atubangan kan harong golping basura,

Kaya kadakol na langaw, mga kino asin kuratsa.

Tigsik ko man an iba sa mga pulitiko ngunyan,

Kun dai kaya na daugon an sa indang kalaban.

Mga panraraot sa pagkatawo dai na inuontokan,

Imbes na an sadiring plataporma iyong atuman.

Tigsik ko an pagpautob kan “COMELEC gun ban”

Pagdara nin mga armas orog an badil ipigbabawal.

Tangani, pagpaputok na nakakagadan malikayan,

Apwera kan badil na kun minaputok nakakabuhay.