Tigsik

Tigsik ko an iba sa opisyal nin gobyerno,

Dai nin pakimano sa paggastos sa pondo.

Kun sa pangangaipo kuta nin tawo naitao,

Dakula nang ginhawa sa mga natitikapo.

Tigsik ko an mga tawo na dai na nin supog,

An ibinubuhay sa pamilya hali sa kinurakot.

Pag-abot nin eleksiyon liwat nang mahurot,

Na sinda liwat botohan iyo an minamawot.

Tigsik ko ngunyan an mga Pilipino Talaga,

Na haluyon nang pigbubully kaining Tsina.

An ibang makatsinoy pigngingiritan pa kita,

Ay ta makarandidato pa an mga lintian na.

Tigsik ko an mga senador asin kongresista,

Na pirmi nag-aapil asin nagsusurog sa Tsina.

Sa maabot na pirilian liwat makandidato pa.

Dai na nungka iboroto pa an mga arog sainda.

Tigsik ko an pulitikong birik-birik an tambod,

Kun saen an may ganahan duman minatakod.

An lalaogon dinadagdagan na sana an hibog,

Basta maabot an pwesto, iyong minamawot .