Tigsik

Tigsik ko an mga tawo na ngunyan makaurag,

Dahil ta may mga kasalan sa satong sosyodad.

Kaya sa ibang nasyon nagpaparadulag-dulag,

Sa paghona na may poder an saindang pirak.

Tigsik ko an mga singkit na talagang makauyit,

Pang-aanab sa teritoryo ta talagang ipigpipirit,

Dawa ano na sana an ginigiribong pang-iipit,

Kaya an nasyon ninda grabe nang mga pasakit.

Tigsik ko man ining sarong palnit sa senado,

Padusang kagadanan isusulong daa kainiho.

Hala, an maeenot na isusunad nang sigurado,

Iyo an sa iyang amo dangan an mga kaalyado.

Tigsik ko ining senador na pig-aapod na virus,

Ta pagsukit sa mga may sala ipigpapadagos.

Pinagkakasararuan kan pag-iribang kulapos,

Sa buhay niya may gusto na daang tumapos.

Tigsik ko ining saro sa kandidato nanggayod,

Para senador an ngaya alagad ta nalalangob,

Igwa na jingle na sa tv, radyo ipigpapadanog ,

Kamanyakan kaini dai kita malingaw na logod.