Tigsik

Tigsik ko ining nagpupuon nang tig-init,

An mainit na saldang malanit sa kublit.

Dagdagan pa kan mga isyu na nag-iinit,

Orog sa linya nin pulitika na nakakauyit.

Tigsik ko an mga tawong haloy nang buta,

Na habo akuon kun ano an tutuo talaga.

Nagkasala an amo ninda pigsusurog pa,

Si tultol na lider iyong pigbabasol ninda.

Tigsik ko an sarong abogadong pugante,

Nag-aasumer, kaayon sa team an sadiri.

Kaiba sa depensa kan dating president,

Pero an sabi kan pag-iriba, ''dai pwede”

Tigsik ko an mga kahimanwa ta ngunyan,

Na kadakol nin manlaen-laen nang hilang.

Orog na sa prostate kan mga kalalakihan,

Ano an kulang, paano ini masulusyunan?

Tigsik ko man an hilang nin kababayihan,

May kanser sa obaryo, sa suso kadaklan.

Kaya maglikay-likay na sa mga pagkakan,

Mga organic na kakanon satong bweltahan.