Tigsik

Tigsik ko ining problema sa bulos nin trapiko,

Na nakakapastidyo sa mga igwa nin behikulo.

Orog nang konsumisyon pa sa mga pasahero,

Haloy-haloy makaabot sa talaan na destino.

Tigsik ko ngunyan ining kadaklan sa kandidato,

Na dai sana naggigirong sa problema sa trapiko.

Solusyon kaini garo dai pa lamang nasa plano,

An pighihinguwa sana kun paano makapwesto.

Tigsik ko pa ining problema kan mga salog ta,

Sa mga pulitiko garo dai sa indang plataporma.

Kun paano haralion ining mga kasilyasan baga,

Na nagbubulos sa tubig na nakakapaati talaga.

Tigsik ko ngunyan ining panahon nin pulitika,

Dawa pa mga mag-aramigo asin mag-aramiga.

Sa “political party” sinda talagang magkakontra,

Sa marahay na iribahan maggaralangan na sana.

Tigsik ko an marhay na mensahe sa katawohan,

Pillion ta an lider nin banwaan na an ipiglalaban.

Iyo an mga interes, mga karahayan kan kadaklan,

Bako na an mawot sadiri nindang kaginhawahan