Tigsik

Tigsik ko an nagtatarabangan na pulitiko,

Kun si ninang, ninong, tinabangan nindo.

Dai sigurado mtabang man sinda sa indo,

Kaya magkanya-kanya nang diskarte kamo.

Tigsik ko ining panahon na talagang mainit,

Kabaing nin pulitika na padagos na nag-iinit.

Daing maginibo ta maboto nanggad nin pirit ,

Dawa sa pagpili nin marhay talagang masakit.

Tigsik ko ining mauswag na Syudad nin Naga,

Kalidad kan mga proyekto pauswagon logod na.

Mga patinampo dawa pirang taon dai baklas na,

Bakong ampaw pakagibo ta dai nagdelihensya.

Tigsik ko ining kwarta na abang sakit hanapon,

Alagad abang dali sana talagang paggastuson.

Kaya kun dai man kaipuhan dai ngona bakalon,

Ta masakit nanggad kun daing pirak na natitipon.

Tigsik ko an mga nangyayari sa satong kinaban,

Na nagpapagamiaw sa tuyang mga katawuhan,

Magbakli na, pondohon na paggibo nin kasalan,

Tangani nang maiharayo kita sa mga katibaadan.