Tigsik

Tigsik ko ining makaurag na mga tugalsik,

Na sa teritoryo ta desidido sa pang-iikit.

Sa maabot na eleksyon planong makisabit

Sa proseso sa borotohan gustong makasirip.

Tigsik ko an mga kandidatong dai natatakot,

Na magsimbag kun an mga tawo naghahapot.

Kaya kun may mga debate nang ipinapaapod,

Dai nagdudulag dangan tulos nang minaabot.

Tigsik ko an nauuyam nang namamanwaan,

An mga istilo, puon kaidto sagkod ngunyan.

Kada pirilian, madadangog puro ralamudaan.

Garo dai manggana kun dai manraot kalaban.

Tigsik ko, mga pulitiko sa pirilian na maabot,

Beinte peso kada kilo nin bagas pighihingabot.

Na mga pulitiko, sa mga botante makaguyod,

Pakatapos kan pirilian, presyo magdanay logod.

Tigsik ko, mga botante ngunyan na muklat na,

Na dai ipigriribay an mandato asin honra ninda.

Sa diit na kwarta, bagas na bokbokon, de lata pa,

O anupamang bagay na karibay kan futuro ninda.