Tigsik

Tigsik ko an kadaklan sa mga kandidato,

Na sa kapangganahan dai nakasisiguro.

Kaya kaipuhan mangwaras nin dawa ano,

Na nakawawara sa dignidad kan mga tawo.

Tigsik ko an iba sa mga kandidato ngunyan,

Na dawa dai nin kwarta alagad malalauman

Sa serbisyong tutuo na sa tuyang kaipuhan,

Bako an tuyo kun nakapwesto, magpayaman.

Tigsik ko an mga botante na ganid asin tuso,

Na nagparahagad kwarta sa mga kandidato.

Alagad pag-abot nin oras dai man ibinoroto.

Masupog na ipakakan iyan sa pamilya nindo,

Tigsik ko kun oras na nin tawo na magadan,

Sa paagi nin aksidente, kalamidad ,sa hilang,

Daing maginibo an kwarta, poder, kasikatan,,

Kun bawian nin diyos kan buhay na sinublian,

Tigsik ko ining manlaen-laen na panghaplas,

Sa kagugusgos sa pandok pati dungo napalgas.

Alagad si mga kulugo, amurang dai man nainas,

Naloloko sana kan produkto nin mandurugas.