Tigsik

Tigsik ko sa ngunyan an Syudad nin Naga,

Nin huli ta an eleksyon tapos na man baga.

Tibaad lamang mareparo an mga bangketa,

Piriot na talaga nin mga iligal na paratinda.

Tigsik ko ining manlaen-laen na propesyon,

Kun dai magibo nin tama an mga obligasyo.

Siguradong dakulang problema an aabuton,

Kaya magmaan na an kredibilidad atamanon .

Tigsik ko man ngunyan an iba sa mga tawo,

Na sa itinao nin Diyos na buhay dai kontento.

Kaya ipinapaliwat pa, an hitsura ipinapabago,

Logod an sinublian sanang buhay namimiligro.

Tigsik ko an buhay nin mga tsuper sa tinampo,

Siring man an pirming sabot na mga pasahero.

Sa kada pagbyahe pirmi igwa nin mga peligro,

Kaya an bendisyon nin Diyos ipangadyi nindo.

Tigsik ko an abang init ngunyan na panahon,

Kaya an kadaklan pirmi nasa pag-ekskursyon.

Sa mga haraning lugar na presko, magagayon,

An mga makwarta minadayo sa ibang nasyon.