Tigsik

Tigsik ko an mga taga- PSO kan Syudad nin Naga,

Dawa dai nin request reparuhon an mga bangketa.

Na panu-pano nin mga nakakaulang, nin paratinda,

Sa mga paraagi, nakakapastidyo, asin delikado na.

Tigsik ko man an kadaklan sa satong mga senador,

Na sa mga Pinoy bako man tunay na mga serbidor.

Kundi minaayon kun sa sadiri ninda sana an pabor,

Dai sana labot kun sa namamanwaan magtraydor.

Tigsik ko ining impeachment na pigpapaunug-unog,

Mga Pilipino nagpupuon nang mag-alsa, maanggot

Sa mga pulitiko na apil, biyo pang nagpaparasurog,

Kwartang pigmalgastar delikadong dagos na ianod.

Tigsik ko ining sa mag-aragom nauuso sa ngunyan,

Sa mga babayi man o lalaki ta sige an sarambayan.

An pamilya ninda nagsasapo nin mga kasusupgan,

Iyong apektadong marhay sa indang mga kaakian.

Tigsik ko sa ngunyan ining sa tuya bagang kinaban,

Na panu-pano na nin karerebukan, mga kararatan.

Nagpapahiling na nin kaanggutan an Kagurangnan,

Kaya sa kalamidad, trahedya, kita pinadudusahan.