Tigsik

Tigsik ko an mga motoristang daing pakimano,

Sa indang lulunadan haros gibuhon na eroplano.

Orog kun nakainom pa garong hadi kan tinampo,

Herak man kan buhay na sa indang nadidiskwido.

Tigsik ko an mga tawo na makauragon na tutuo,

Ata may nahiling nang naaksidente sa tinampo.

Imbes mag-apod nin ayuda iniinot an pagretrato,

Ta an iniisip sana iyo an pag reel kan mga iniho.

Tigsik ko pa an iba sa mga pulitiko sa ngunyan,

Ata nanggana na dai pa inuontukan kan kalaban.

Sa mga pandaraya sinda man an nasasahutan,

Aram man ngani an namakal voto sa tutuo lang.

Tigsik ko an mga isyu sa pamamakal nin voto,

Dapat na basulon bako sana an mga kandidato.

Imbes an mga nagpabakal sangatan man kaso,

Tangani na an barakalan na nauuso mapondo.

Tigsik ko man an mga gawi nin magtururugang,

Na sa barangaan nin pagsasadiri dai nag-iiriwal.

Tanda nin paggalang, pagkamuot sa magurang,

An mga ugali na ini iyo an dapat na pangarugan.