Tigsik

Tigsik ko an kasuguan sa mga pulis nanggad,

Sa laog nin sarong taon magpasadit nin tulak.

Ta paano sinda sa mga kriminal makakalapag,

Kun sa pagdalagan an hawak, tulak, magabat.

Tigsik ko ining pagtios ngunyan na panahon,

Kaya grabe na an nangyayaring panghahabon.

Alagad dai iyan dapat gibuhon bagang rason,

Na an nasabing krimen logod na padanayon.

Tigsik ko an mga giyera ngunyan na panahon,

Kan Israel, Iran dangan iba pang mga nasyon.

Apektado gabos, an kamugtakan makahirakon,

Nawarang buhay, kabuhayan paano babawion?

Tigsik ko an grabing paghingowa ta, paghigos,

Alagad kun sa buhay ta dai kaibahan an Diyos.

Masakit nanggad makahawas sa mga pagtios,

Ta Diyos an may plano, may kontrol kan gabos.

Tigsik ko pa ining kinabanon na buhay ta baga,

Dai kita nag-aaram kun ano mangyayari sa aga.

Mahal na Diyos iyo sanang tatao kan gabos na

Kaya dapat pirmi kitang preparado kan buhay ta.