Tigsik

Tigsik ko an mga bagong opisyal nin gobyerno,

Na sa pagtukaw sa pwesto grabe nang trabaho.

Sa pagbabago kan nakaagi na manehamento,

Tangani na mapakarhay pang orog an serbisyo.

Tigsik ko an ibang banwaan na konsumido na,

Orog an kataraid sana kaining Syudad nin Naga.

An tubig na pirming kaipo abang sakit makakua,

Sa paghahalat na makasalod napupurisaw sinda.

Tigsik ko an iba sa mga serbidor nin gobyerno ,

Na ipigoorgulyo pa an pagigin babaero, palikero.

Alagad orog pa logod na sinasamba, na iniidolo,

Kan mga bungog na, buta pa sa kun ano an tutuo.

Tigsik ko an kinagawian kaidto pang panahon,

Kun nasisiripan, na an kalangitan malumlom.

An naiisip tulos kuna no an dapat na kakanon,

Na nababagay nanggad sa oras na maliputon.

Tigsik ko pa an mga tawo ngunyan sa kinaban,

Na dai nang takot sa paggibo nin mga kasalan.

Mantang may oras pa an mga kararatan likayan,

Tanganing mga kalag dai sa kalayo mapaduman.