Tigsik

Tigsik ko an mga kahimanwa ta ngunyan,

Kun gustong mga kahelangan malikayan.

Mag-ehersisyo pirmi, tama an pagkakan,

Magturog amay, an “wifi” dai pagpuyatan .

Tigsik ko an mahahamis na mga inumon,

Siring man an masisiram na mga kakanon.

Dai pangana kan mga ini ta iyong aabuton,

Dyabetis, asin iba pang helang sasapuon.

Tigsik ko kun tios pa asin pirming tikapo,

Dai ngona magparaorder nin kun anu-ano.

Nin mga hulugan na gamit ta dai sigurado,

Na kayang bayadan kan sa indong sweldo.

Tigsik ko, mga tawong sa buhay nagsasakit,

Magpangadyi imbes na magdamlag kaiisip.

Mga kahagadan itatao man nin Diyos ngapit,

Isurender sa Iya an gabos, asin an pagsarig.

Tigsik ko ining mga tawong mahinguwahon,

Sa pagpaasenso sa buhay ninda mahiguson.

Yaman na kinabanon bako iyo sana an isipon,

Kundi an pagpapayaman sa gibong langitnon.