Tigsik

Tigsik ko inint mga Kristiyano na man talaga

Na an inienot dapat na ginigibo sa pagkaaga.

Magpangadyi, pasalamat ta napagmata pa,

Biyaya nin Diyos na dapat nyato ipag-ogma .

Tigsik ko kun an nakaagom sa indo mabuot,

Sigurado na regalo iyan kan Mahal na Diyos.

Alagad kun an naagom nindo an ugali maraot .

Itinao asin hali iyan sa mga dyablo nanggayod.

Tigsik ko man an kadaklan sa panugangan,

Na mabuot bakong kalaban kan manugang.

Sa tunay na aki talaga, sa indang pagtratar,

Kaya biyaya man itinatao kan Kagurangnan.

Tigsik ko kun panahon na nin mga pagbagyo,

Preparado man pirmi an sa tuyang gobyerno.

Arog kan pagrilinig kan mga kanal na barado,

Sa ” calamity fund” makinabang an mga tawo.

Tigsik ko pa an kadaklan ngunyan sa pulitiko,

Kan nangangampanya pa sana an mga iniho.

Grabing ipigpromisa mantang nasa entablado,

Alagad sige na sanang iriwal kan makapwesto.