Tigsik

Tigsik ko ining Santiago 3;6 na may kasabihan,

An dila ta sadit sana alagad pano nin kararatan.

Na pweding sa kapwa ta makaraot, makagadan,

Garo sadit na kalayo, nakakasulo nin kadlagan.

Tigsik ko an ikaapat na SONA kan president ta,

Sa mga kurap na nasa gobyerno nag-aanggot na.

“Masupog man kamo sa satong mga kahimawa,

Pondo na para sa mga tawo sa indong pigkukua.”

Tigsik ko kun an tulak kan mga aki dai nin laog,

Sabi ni PBBM, sigurado, dai maandar an hutok.

An” feeding program ,” ipapadagos nanggayod,

Tangani na an mga eskwela pirmi sana barasog.

Tigsik ko an isyu sa “flood control” na viral talaga,

Dai pa haman an proyekto mga pondo inanod na.

Ta ipigsubi daa kan mga tawong dai nin konsensya,

Kun nagbabaha an nagsasapo mga kahimanwa ta.

Tigsik ko an dai nin pagkaherak na nasa gobyerno,

Pondo kan gobyerno an ibubuhay sa pamilya nindo?

Imbes na pakinabangan na kan mga tawong tikapo,

Logod makonsensiya asin magbago na man kamo.