Tigsik

Tigsik ko an mga mas gusto sa kadikluman,

Kaya mga krimen rampante na sa ngunyan.

Habo ninda kan buhay na nasa kaliwanagan,

An buhay na may Diyos pasiring sa kalangitan.

Tigsik ko kun bulan na Agosto minaabot na,

An mga Pilipino nagkakasiribot man talaga.

Tangani an mga lenggwahe ta tawan honra,

Tataramon na nagbubugkos sa kahimanwa.

Tigsik ko an Sangguniang Panglungsod, Naga,

Nin huli ta an Buwan ng Wika nagpupuon na.

Sa sa indang sesyon, Tagalog an gamit ninda,

Kaya dawa lawi sa pagtaram, pinipirit talaga.

Tigsik ko an mga kanta o kansyon na Bikolnon,

Pighuhurot kan LGU Naga na pirmi patugtugon.

Na sa mga kompositor magtao nin inspirasyon.

Tangani mapauswag mga sadiring komposityon.

Tigsik ko an tigsik, logod tawan man atensyon ,

Na siring man sa mga kanta nyatong Bikolnon.

Tibaad mawara giraray pag-abot nin panahon,

Kun dai maipasa sa masurunod na henerasyon.