Tigsik

Tigsik ko an dapat sa pagkaaga pagmata,

Pagpangadyi an enoton bago an gabos na.

An katanusan nin Diyos tulos hanapon ta,

Na an gabos na kaipo, isusunod na sana.

Tigsik ko kun an nagtitios nakapanghabon,

Nin huli sa katiusan tulos nang lalangubon.

Pero kun opisyal nin gobyerno an mahabon,

Nin huli sa personal na interes, padudulagon.

Tigsik ko an iba sa mga opisyal nin gobyerno,

Nagparapayaraman sana sa sa indang pwesto.

Halii sa ampaw na patrabaho sa mga proyekto,

Kaya an namamanwaan iyong nasasakripisyo .

Tigsik ko ining nasyon na Pilipinas na dimalas,

Nin huli sa mga tawong may ugaling sa hudas.

Na gusto na gibuhon legal, mga panghahabas,

Mahahabon sa gobyerno gusto iarog ki barabas.

Tigsik ko ining mga senador na Bikolano kono,

Alagad makasusupog an mga ginigibo sa senado.

An pigsesrbihan bako an interes kan mga Pilipino,

Kundi an bakong makaDiyos ninda na mga amo.