Tigsik

Tigsik ko an sinasabi sa 6: 18 enot na corento,

An pagdurog sa bakong agom bawal na tutuo.

Nagkakasala nanggad sa sadiring lawas iniho,

Ta ining hawak ta templo kaining Ispiritu Santo.

Tigsik ko an PNP na sinipa na naman an pamayo,

Pero si mga pulis na kriminal yaon pa sa pwesto.

Na sa manlaen-laen na krimen pirmngi imbwelto,

Dapat sinda an sirikadan ta grabe na kapastidyo.

Tigsik ko man ngunyan ining Syudad nin Naga,

Na an trapiko kaarog na man sa Metro Manila.

Sa paabuton na piyesta pwede ini mag-orog pa,

Ta maruruso naman mga deboto ni Peñafrancia.

Tigsik ko man ining papaabuton nang piyesta,

Magpasiguro nanggad nin tubig an gabos na.

Sa kadakulan na magaramit an bulos maluya,

Para dai mapastidyo magtipon tubig tulos na.

Tigsik ko an mga kontraktor na nagpakangana,

Sa pagsubi kan pondong pagkontol sa pagbaha.

Alagad si mga pagbaha nag-orog ta dai napara,

Si bilyones na pondo sa proyekto iyo an nawara.