Tigsik

Tigsik ko an verso sa Levitico 18:22 na sinasabi,

An makidurog na garong mag-agom dai pwede.

Kan babayi sa babayi o kan lalaki man sa lalaki,

Para sa Mahal na Diyos, iyan gibong makangiri.

Tigsik ko ining isyu kan kurapsyon sa gobyerno,

Gubok na an hutok ka umoy nang mga Pilipino.

Hupyak an tulak, lugom na sa baha an mga tawo,

Nin huli kan mga kalag, ampaw na mga proyekto.

Tigsik ko pa ini talagang mga buaya sa gobyerno,

Si mga marhay pang tinampo rinaraot nang tuyo.

Alagad si mga raraot na logod, dai ipigpapagibo,

Tangani sana magkinabang sa panibagong pondo.

Tigsik ko, mga kontraktor na sa pang-ikit imbwelto,

Kan ipaarapod na sinda sa senado asin kongreso.

Tabog-tabog an ganot, ninerbiyos sinda nin todo,

Pero si iba garo dai sana na garo pa mga orgulyuso.

Tigsik ko kan panahon na an nauuso pag-asenso,

“From rags to riches,” hale sa marhay na proseso.

Alagad ngunyan “from robs to riches” iyo an uso,

Dai na lamang pati nasusupog ining mga kurapto.