Tigsik

Tigsik ko an iba sa opisyal nin gobyerno,

Na sa kurapsyon pirmi na mga imbwelto.

Logod makaisip na magbakle, magbago,

Aanuhon an yaman kun mapaimpiyerno?

Tigsik ko man ining nasyon tang Pilipinas,

An pagkakaigwa ni demokrasya pinahiwas.

Orog na ining demokrasya sa panghahabas,

Kaya kwarta kan mga nagbubuwis nalilimas.

Tigsik ko an mga Pinoy na dismayado logod,

Ta kun an mga buaya madali nang mapontok.

An mga imbestigado rminabirik an tambod,

Kaya sa maiinit na isyu nalilihis na nanggayod.

Tigsik ko kun an Traslacion baga nangyayari,

Kadakol kan minaabot na deboto, “devotee”

Pero mas dakol, mga boyadores na ”de bote”

Namamarong kaya an liquor ban daing serbi.

Tigsik ko an mga debotong harani sa Naga,

Logod dai na makisusuan pa sa mga bisita.

Santaon, an imahe ni Ina yaon sa Basilica,

Ano ta dai pa maghapros bago magpiyesta.