Tigsik

Tigsik ko ining mga inaagihan ta ngunyan,

Sa linog, baha, bagyo, kita nanganganaan.

Panlalatob na iyan sa tuya na makasalanan,

Kaya magbakli na sa paggibo nin kararatan .

Tigsik ko kitang mga Pinoy na may isusugad,

Na kun may lugar na inaagihan nin kalamidad.

An pagtabang sa inda dai nawawara nanggad,

Nin huli ta natural sa puso ta an pagkaherak.

Tigsik ko ngunyan ining dai natatapos na isyu,

An kurapsyon sa” flood control” na mga pondo.

Trilyones an isinubi kan mga buaya sa gobyerno.

An nagsasapo, nagtitios an mga pobreng Pilipino.

Tigsik ko digdi sa Pilipinas ngunyan na panahon,

Na kun pobre an nagkakasala, nakakapanghabon.

Tulus-tulos nahuhusgahan na karselon, langubon,

Kun mga poderoso, haluyon sana an imbistigasyon.

Tigsik ko ining mga biktima nin linog asin bagyo,

An mga kamugtakan ninda makaherak na gayo.

Alagad kun magrani, mangadyi sa Diyos na tutuo,

Dai pababayaan asin kaheherakanan Niya kamo.