Tigsik

Tigsik ko an mga tawo ngunyan na panahon,

Na siribot pirmi pagdutdot kan mga celfon.

Pagmata, mensahe tulos sa FB an hihilingon,

Imbes an Biblia na may banal na tataramon.

Tigsik ko an iba sa mga opisyal nin gobyerno,

Dai nin lisensiya nagmamaneho nin behikulo.

Orog kun nakainom pa hay ta sigurado kamo,

Maninimbag sa bayolasyon nindong giniribo.

Tigsik ko an buhay kan mga tawo sa ngunyan,

Bihira na baga an nakakaabot nin paggurang.

Dahil sa manlaen-laen na sanang pagkakan,

Na golpihon nin mga kemikal na pampasiram.

Tigsik ko an iba na igwa nang mga makulog,

Mga bolong na natural yaon sana sa palibot.

Na mga dahon na pweding gagaoon o idapog ,

Kaysa kemikal na bolong na orog nakararaot.

Tigsik ko an ibang mga senyor na o guragod,

Kun malipot an panahon golpi nang makulog,

Mga kasu-kasuan biyo nang nagraratok-ratok,

Pagsakat ngani sa katre haros dai na maagod.