Tigsik

Tigsik ko ining “the big one “ na pigtatakutan,

Apwera pa kan mga paglinog na namamatean.

Alagad ta dai kita nin dapat pagparaharaditan,

Ta orog na “the big one ,” satong Kagurangnan.

Tigsik ko, mga nangyayari ngunyan na paglinog,

Na ibang parte kan daga sa kinaban natatanyog.

Sarong paagi sa tuya na pagpakol o panlalatob,

Kaya magbwelta na sa Diyos si mga nagtalikod.

Tigsik ko man an saro sa mga ipigrerekalmo,

Kan iba sa sa tuyang mga lokal na gobyerno.

Na sa pagpasweldo daa kun minsan atrasado,

Orog na sa mga “job order,” sanang empleado.

Tigsik ko pa ini bagang mga iligal na paratinda,

Orog na sa mga pampublikong saudan talaga.

Oroaldaw nakikipagpatentero sa mga gwardya,

Pagtalikod kan parasitar nabwerelta man sana.

Tigsik ko an nakakapastidyo kun nagsasaod,

Na sa pamamakal ta biyo nang nakakapiriot.

An mga ilegal vendor na matatagas an hutok,

Sa mga itinaong lugar, oras, habo magsunod.