Tigsik

Tigsik ko an paggibo kaidto pa nin arko ni Noe

Sanggatos na taon na sa mga tawo siya nagsabi,

Na sa paggibo nin kasalan magbago an mga ini,

Dai nagturubod sagkod na an delubyo nangyari.

Tigsik ko ining helang na kanser sa sosyodad ta.

Ini iyo an dakulang problema manungod sa droga.

Dawa ano pang kurupot kupot dai napapara baga,

Ta ibang nasa gobyerno, mga drug lord kakutsaba.

Tigsik ko an iba sa mga tawo na tutuong pagtios,

Mantang tinatarabangan minaarabuso na logod.

Orog na minahurugak imbes bagang maghirigos,

An mga nagtatarabang nadidisganar nanggayod.

Tigsik ko pa digdi palan sa sa tuyang probinsiya,

Kadakol man daang mga proyektong kalag sana.

Kun may nahaman man malasado pakagibo daa,

Kaya an mga Bikolano, naaanggot na man talaga.

Tigsik ko an igwang mga tangkal na namamarong,

Siring man may mga manukan sa kataid na harong,

An mga pagtaraid naghihirilang na asin narerebong.

May nagrereklamo pero an iba dai sana naggigirong.