Tigsik

Tigsik ko an mga tawo na harabo pa magbago,

Kaya padagos pa nanggad sa mga salang gibo,

Dai natatakot na an mga kalag mapaimpiyerno,

An suba pa, matinda na sana sinda duman yelo.

Tigsik ko kun sa senado, kongreso may sesyon,

Sige sana an iriwal, dai nanggad nagkakauruyon.

Ta pigsusururog, pag-iribang igwa nin kurapsyon,

Orog na an mga may anomaliya sa flood control.

Tigsik ko man ining mga mahihibog an lalawgon,

Orog an mga nasa gobyerno na mga mahabon.

Hayahay an buhay sa mga auto, mga mansyon,

Mantang dakol, mga kahimanwang nagugutom.

Tigsik ko man an kadaklan kaining mga pulitiko,

Na kun nagkakaigwa nin kaso nagigin paralitiko.

Inaatake sa puso, nahahayblad, natatrangkaso,

Kaya naka wheel chair na sinda imbes nakaawto.

Tigsik ko an ibang myembro kan SK Federation ,

Na an nahahaman sana pakawat,pabasketball.

Mayu sa programa an mental health, addiction,

Kan mga hobenes na nalilihis na nin direksiyon.