Tigsik

Tigsik ko an mga tawo naggad na mangmang,

Nagpasalamat sa nilalang bako sa Kaglalang,

Ta an Sierra Madre daa nagpaluya kan Uwan,

Kun bako sa Diyos an Sierra Madre mayu man.

Tigsik ko kaidto sa mga pampublikong ospital,

Mga pasyenteng nag- aagrangay, sinisirilyakan

Matitigbak na lamang dai pa napagseserbihan,

Pero ngunyan an palakaw may pagbabago man.

Tigsik ko man an kadaklan sa mga residente,

Ata dai pa nakakabangon sa bagrat na grabe,

Siribot sibot nanggad magkaigwa nin kuryente,

Pasalamat ngona kuta, ta lugar ta dai nagolpe.

Tigsik ko man an mga nagin biktima nin bagyo,

Na an mga pagsorosadiri, kabuhayan nalimpyo.

May mga binawian nin buhay dahil sa dilubyo,

Si mga trangkilo, sa Diyos ta pasalamat kamo.

Tigsik ko kun may mga pagbabaha o dilubyo,

An naroromdoman si mga kuraptong pulitiko,

Na nagsubi kan sa “flood control“ na pondo,

Nasa mansion, kaya sa baha dai nang piligro.