Tigsik

Tigsik ko an mga nagsasarig sa Diyos na tutuo,

Na dawa ano pa man umabot na linog o bagyo.

Bulaos an pagtubod na sinda man protektado,

Ta dai sinda pababayaan kaya an isip trangkilo.

Tigsik ko pa ining manlae-laen na sanang sugal,

Na sa ngunyan kontrobersyal ta sige nang iriwal,

Ta nadadaog na daa kan mga ilegal an mga legal,

Kaya an mga bangkero biyo na daang nag-aarual.

Tigsik ko kun an mga pobre iyo an minahirilang,

Minatirios pagparapila sa pampublikong ospital .

Ta kadakol kan mga pasyente na pigseserbihan,

Kaya an pagparahalat, dagdag pa sa kasakitan.

Tigsik ko pa man sa ngunyan an mga kaakian ta,

Nagpaparahoben na an igwa nin helang sa mata.

An sobrang paggamit celfon saro sa dahilan daa.

Pagkaraot kan hutok, orog kun sa omboy pa sana.

Tigsik ko man kitang mga tawo sa kinaban baga,

Na an buhay ta nagpaparahalipot na sana talaga.

Kaya an anggot, hinanakit sa kapwa haraleon na

Magpakumbaba, magpatawad na para maogma.