Tigsik

Tigsik ko an pagselebrar ta kaining Pasko,

An isipon bako sana mga kakanon, regalo.

Katuninungan an kahulugan kaining tutuo,

Dapat oroaldaw tuninong an isipan nindo.

Tigsik ko an mga empleado o may trabaho,

An bonus nakua na, kaya mga masentabo.

Si mga may utang magbarayad man kamo,

Orog kun inaalamag na an mga utang nindo.

Tigsik ko an buhay digdi sa kinaban baga,

Kadakol mga kapareho ta na garadan na.

Alagad ika, ako, kita asin iba, buruhay pa,

Kaya an satong Kaglalang pasalamatan ta.

Tigsik ko man an mga pulitikong imbwelto,

Sa kurapsyon na garo mga buaya asin kuto.

Sa languban na malipot sinda namimiligro,

Ta tibaad arestuhon sa panahon nin Pasko.

Tigsik ko man kitang mga ninang asin ninong,

Dai magtago sa mga linuhudan, mga tinubong.

Dawa dai nin panregalo sa indong pagdaguson,

Ta tibaad pa sinda an may dara nin mga datong.