Tigsik

Tigsik ko kitang nagsasarig sa Kaglalang ta,

Enot na biyaya na ipitatao sa tuya pagkaaga.

Iyo an magaya -gaya kita sa satong pagmata,

Kaya sa sa tuyang Diyos pasalamat pirmi kita.

Tigsik ko an mga tawong nakakalingaw na baga,

Sa pagtubod, sa pag-arang sa Kagurangnan ta.

Kaya sa paggibo nin mga krimen, pasil na sana,

Saen man kita magduman, buhay ta delikado na

Tigsik ko an dai nin herak na may mga negosyo.

An “ photo copy” sa mga ospital na pampubliko

Kada pahina abaa nang mahal, grabe an presyo,

Dagdag pang pasakit sa mga pasyenting tikapo.

Tigsik ko an mga magurang sa panahon ngunyan,

Reparuhon, bantayan an sa tuyang mga kaakian.

Ta kun igwang magabat na problemang inaagihan,

Tangani kun ano an pighahaditan tulos maagapan

Tigsik ko pa kitang mga senyor na, gururang na,

Grabe nang kakundian, malilingawan na talaga.

Nagparahanap minsan kan kalson dai nakukua.

Iyan palan ta nakaalampay man sana sa abaga.