Tigsik

Tigsik ko an mga tawong Kristyano na talaga,

Kaya kun sa inda may naggibo nin daing data.

Dai na nagbabalos ta ipigpapasaDiyos na sana,

Ta an sabi kan Diyos “ako an mabalos” ngaya.

Tigsik ko ining isyu ta sa pamaskong handog,

Dai na daa magpirila ta sa harong ihaharatod.

Alagad may mga tawo na nagkurulog an buot ,

Dai ngani nagpirila pero sa panao dai inarabot.

Tigsik ko kun igwa nin okasyon o selebrasyon,

Orog ining Pasko an mga aki mga maogmahon.

Kadakol na regalo an nareresibe asin kakanon,

Ta kun dai pigtaguan ninda ninang asin ninong.

Tigsik ko man an pagselebrar ta kaining Pasko,

An mga ponsyonan asin parartihan wala tuo.

Sa mga kakanon maglikay nanggad na kamo,

Ta kun an dyabetis, hayblad umatake sa indo.

Tigsik ko pa kun igwa nin ponsyonan, okasyon,

May mga bisita,may dara na nin plastik, dahon.

Ta ata barasog na maparatos pa giraray kakanon.

Kaya dai nanggad mapapara an kanta ni Sharon.