Tigsik

Tigsik ko an ugali kan iba sa mga tawo,

Na dawa pa anong kayod dai naasenso.

Ta kun sinasabayan pa nin mga pagbisyo,

Garo nagtitigis nin tubig sa labot na baso.

Tigsik ko man kitang mga Pinoy nanggayod,

Na sa mga erehiya kaniguan mga pagtubod.

Kaya an Diyos na buhay naaanggot nin orog

Ta mga sabi-sabi kan tawo an mas inuutob.

Tigsik ko man kun an Bagong Taon minaabot,

May mga tawong matatagas talaga an hutok.

Ta dai nanggad napupugulan an magpaputok,

Orog na an paputok na gibo o hali sa yukyok.

Tigsik ko pa ining mga pagtutubod na anas,

Na kun Bagong Taon igwang birilog na prutas.

Tanganing magdara daa nin orog na bwenas,

Bako sa Diyos nagtutubod mas madidimalas.

Tigsik ko man kun siisay an siniswerte talaga,

Sa mga birilog na prutas kundi an mga tindera.

Pinapatubod sana kamo na iyan swerte ngaya,

Pagkatapos kan okasyon sinda an makakwarta.