Tigsik

Tigsik ko an sarong tugon nin Diyos sa kaakian,

Kun igagalang, mamahalon nindo an magurang.

Tatawan kamo Niya nin mauswag na kabuhayan,

Dangan halawig na buhay sa ibabaw nin kinaban.

Tigsik ko kun kita minapasiring sa Metro Manila,

An iba sa mga tinampo garo na sungkaan baga.

Kaya an mga” reblocking ”pirmi na sanang igwa,

Na sa mga byahero nakakaabala na man talaga.

Tigsik ko an kada proyekto nin satong gobyerno,

Orog na sa mga edipisyo, tulay asin patinampo.

Kaya nagigin ampaw, palpak pirmi an pakagibo,

Ta an SOP, iyong nakakapalumoy kaini nin husto.

Tigsik ko sa panahon tang ini na nakahahadit ,

Na sa buhay nin mag-aragom ata nagsasarakit.

Hadaw ta naiisipan pang magkaigwa nin kabit,

Kaya paano an mga kalag ninda makapalangit,

Tigsik ko man ining mga parainom o paratagay,

Sigihon sana sagkod na an mga katoy o an atay.

Marayrahay pa kaya tagay sana kamo nin tagay,

Kun maghahilang na, pwerte ta dagos an lamay.