Tigsik

Tigsik ko ngunyan ining sa tuyang kinaban

Na panu-pano na baga nin mga kararatan

An pesting corona, kita na pinapadusahan

Alagad sige pa an paggibo nin mga kasalan

Tigsik ko man ini bagang pagpapabakuna

Dai na matakot makipagsapalaran na sana

Isarig sana sa Mahal na Diyos an gabos na

Ta kun oras na, sigurado, magagadan kita

Tigsik ko pa ining abang init nang panahon

An halu-halo, ice cream iyo man barakalon

Ice candy na dawa matabangon, masulong

Maglikay na sana ta tibaad kamo dyabitison

Tigsik ko an pag istar sa gilid nin kadagatan

Kan mga panahon, an iba ini pinaghahabuan

Alagad ngunyan biyo nang pinag-aaragawan

Ta an mga baybayon mas pinagkakwartahan

Tigsik ko an iba-ibang putahe sa sosyodad ta

Igwang kaldereta nin mga tsismoso, tsismosa

Pakbit na kabit asin piday, adobong daldalera

Sisig na maurihon, sinigang, paksiw na atumira