Tigsik

Tigsik ko kun an mga tawo naagi nin pagtios,

Kun minsan pigtutuyo iyan kan satong Diyos.

Ta kun marhay an buhay lingaw nang dagos,

Alagad kun nagsasakit, nakakarumdom tulos.

Tigsik ko, pagirumdom sa mga kababayihan,

Maglikay sa mga manyakis na kalalakihan.

Dai magsulot nin malaen na mga kasulutan,

Na bako kamo an magin dahilan nin kasalan.

Tigsik ko ining bagyo na maabot na naman,

Na iyo naman pighaharaditan kan kadaklan.

Mga buhay, pagsasadiri pwede madanyaran,

Nin huli sa darang duros sa makusog na uran.

Tigsik ko man an mga magurang sa ngunyan,

Importante an paggiya sa indong mga kaakian.

Ta kun nalalagalag, nalilihis na sinda nin dalan.

Mga paghingoa nindo masasayang sana man.

Tigsik ko an mga lalaking pirmi nasa inuman,

Kun dai susugon kan agom lingaw kan ulian,

Kaya nasasalisihan siya ni padi kun minsan,

Kaya nag-aataman nin aki na bako niya man.