Tigsik

Tigsik ko ngunyan na panahon an kadaklan,

Pagmata pagkaaga bago an celfon kaputan,

Pig-ienot, mga tataramon nin Kagurangnan,

Sa Bibliya, na yaon dyan, satong kaligtasan.

Tigsik ko an kudeta na nangyari sa senado,

Napatalsik an senador na dati namamayo.

Isyu sa impeachment delikado mabulilyaso,

Nagkasararo na sindang mga magkaalyado.

Tigsik ko an ibang mga opisyal nin gobyerno,

Na buta bungog sa tunay asin tutuong isyu.

Malinaw pa sa salming an kasalan na ginibo,

Protektado an amo, bako si sa inda nagboto.

Tigsik ko ining magayon tang Bulkan Mayon,

Alagad ta nagpapadagos pa an pag-agrutong.

An iba pang mga bulkan tulos na nakikiayon,

Sa maiinit na isyu sa gobyerno ta dai na uyon .

Tigsik ko, mga estudyanting nagbabakasyon,

Na nagpapahingalo sa masasakit na leksyon.

Sa ngunyan dawa magparatururog maghapon,

O kaya magdamlag, magkawat sana sa celfon.